لاہور میں جناح ہائوس کا مختلف سکولز کے طلبا و طالبات اور اساتذہ نے دورہ کیا۔ دورہ کرنے والے اساتذہ اور طلباو طالبات نے جناح ہائوس کو آگ لگانے کی مذمت کی،9مئی کے پرتشدد احتجاج میں جناح ہائوس میں توڑ پھوڑ کے ساتھ آگ لگائی گئی، اساتذہ اور طلباو طالبات نے تاریخی عمارت کی حالت زار دیکھ کر شدید غم و غصہ کا اظہار کیا۔طلبا و طالبات نے شہیدوں کے بلند درجات کیلئے دعا بھی کی۔اساتذہ نے کہا کہ یہ گھر بابا ئے قوم محمد علی جناح سے منسوب ہونے کے باعث قابل قدر تھا، منظم سازش کے تحت تخریب کاری کی گئی۔ شرپسند ایسی سازشوں سے فوج اور پاکستان کو کمزور نہیں کرسکتے۔ انہوں نے کہا کہ فوج کا دشمن اصل میں پاکستان کا دشمن ہے، 9 مئی قومی سانحہ ہے ،ذمہ داروں کیخلاف کارروائی ہونی چاہئے، کوئی بھی شرپسند سزا سے نہیں بچنا چاہیے۔اساتذہ نے کہا کہ شرپسندوں نے شہدا کی حرمت کو بھی پامال کیا جو شرمناک عمل ہے، نوجوانوں کو نفرت کی بنیاد پر سیاست کرنے والے عناصر کی حوصلہ شکنی کرنی چاہیے۔